У Менску прадаюць недарагія студыі фармату «заязджай і жыві»

• 10.02.2025, 12:14

Праўда, у нерухомасці ёсць адзін важны нюанс.

У Заводскім раёне Менска прадаюцца маленькія адрамантаваныя студыі вельмі прывабнымі коштамі. Праўда, ёсць нюанс - гэтыя памяшканні не належаць да жылых. «Зеркало» паглядзела, што гэта за нерухомасць.

На вуліцы Галадзеда, у цагляным дзевяціпавярховым доме № 23/2, які пабудавалі ў 1975 годзе, прадаецца студыя. Памяшканне размешчанае на першым высокім паверсе дома. Адзначаецца, што з афіцыйных дакументаў гэта памяшканне, якое не належыць да жылога фонду. Уваход у студыю вядзе з пад'езда.

Памяшканне займае агульную плошчу 14,4 м², з іх пад жылым пакоем знаходзіцца 9 м². Ёсць сумешчаны санвузел. Памяшканне адрамантаванае, у ім новая электраправодка, вентыляцыя, унутраныя перагародкі. У лоджыі ўсталяваны энергазберагальны шклопакет і змантажаваная электрычная падлога.

Прадавец запэўніў, што камунальныя плацяжы зімой не перавышаюць 100 рублёў (з улікам ацяплення і электрычнасці). Цяпер студыя здадзена ў арэнду за 250 даляраў (блізу 848 рублёў паводле курсу Нацбанка на 10 лютага) на месяц.

Жыллё прадаецца за 108 138 рублёў ці 31 900 даляраў, пры такім кошце «квадрат» каштуе 7509 рублёў ці 2 215 даляраў.

Яшчэ адно камерцыйнае памяшканне, прыстасаванае пад жыллё, знаходзіцца ў пасёлку Сосны на вуліцы Красіна, 29 (гэта дзесяціпавярховы цагляны дом, пабудаваны ў 1986 годзе). «Прадаецца камерцыйнае памяшканне, якое цяпер функцыянуе як кватэра, але ідэальна пасуе для бізнэсу. Гэтую прастору можна лёгка адаптаваць пад офіс, салон, краму ці іншыя віды дзейнасці», - паведамляецца ў аб'яве.

Студыя, выстаўленая на продаж, размешчаная на першым паверсе. Яна займае агульную плошчу 30,7 м², жылая плошча складае 26,1 м². Ёсць сумешчаны санвузел.

Нерухомасць прадаецца за 111 528 рублёў або 32 900 даляраў. Гэта значыць кошт «квадрата» - 3633 рублёў або 1072 даляраў.