Кожны трэці мянчук гатовы з'ехаць з Беларусі праз палітыку

• 10.02.2025, 18:05

Такая статыстыка прыводзіцца ў справаздачы чыноўнікаў.

«Кіберпартызаны» атрымалі доступ да справаздачы чыноўнікаў з Менгарвыканкама, у якой гаворыцца аб выніках апытання менчукоў і тлумачыцца, як санкцыі ЕЗ і ЗША паўплывалі на эканоміку.

Дакумент, які трапіў да “кіберпартызанаў”, быў створаны ў чэрвені 2022 года. Згодна з апытаннем, кожны трэці мянчук гатовы з'ехаць з Беларусі назаўжды ці на некаторы час праз палітыку.

«Значная частка сталічных жыхароў (40%) мяркуе, што дачыненні ўлады з народам характарызуюцца вострымі супярэчнасцямі», - пішуць чыноўнікі.

Не абароненымі ад самаўпраўнасці чыноўнікаў ўважаюць сябе 43% рэспандэнтаў. Толькі 4% звязваюць надзеі на паляпшэнне свайго жыцця з мясцовымі ўладамі, 8% - з рэспубліканскімі, вынікае з апытання.

У эканамічным аглядзе аўтары справаздачы скардзяцца на зніжэнне ВРП (валавога рэгіянальнага прадукту) і страты экспартнага прыбытку менскіх прадпрыемстваў.