Украіна паспяхова выпрабавала новую балістычную ракету

• 11.02.2025, 15:28

Рыхтуюцца ўдары па тэрыторыі РФ.

Міністэрства абароны Украіны заявіла аб паспяховых выпрабаваннях новых балістычных ракет. На афіцыйнай старонцы ведамства ў Х (Twitter) быў апублікаваны ролік з кадрамі ракетнага комплексу "Нептун" і заявай аб прыярытэтах на 2025 год.

«Зброя далёкага радыусу дзеяння - ключ да зніжэння вайсковага патэнцыялу агрэсара. У 2024 годзе Украіна пашырыла вытворчасць ракет, выпрабавала новыя балістычныя і крылатыя ракеты і ўмацавала супрацьпаветраную абарону. У 2025 годзе акцэнт па-ранейшаму робіцца на высокадакладных глыбокіх ударах і найноўшай супрацьракетнай абароне», - заявілі ў Мінабароны Украіны.

Такія ракеты могуць гарантавана паражаць самыя абароненыя ваенныя, прамысловыя і інфраструктурныя аб'екты Расеі.

Магчымыя цэлі для ўдараў уключаюць:

нафтаперапрацоўчыя заводы і нафтасховішчы, што скароціць экспартныя даходы Расеі і створыць паліўны крызіс;

склады боепрыпасаў і камандныя цэнтры войска РФ, што разбурыць вайсковую лагістыку акупантаў;

буйныя прамысловыя аб'екты, якія ўдзельнічаюць у вайсковай праграме, у тым ліку заводы ў вытворчасці ракет, дронаў і бранятэхнікі.