Аўстрыйскія ультраправыя правалілі фармаванне новага ўрада

• 12.02.2025, 18:13

Цяпер магчымыя датэрміновыя выбары.

У Аўстрыі сарваліся перамовы аб стварэнні кааліцыйнага ўрада паміж вельмі правай Аўстрыйскай партыяй свабоды (FPÖ) і кансерватыўнай Аўстрыйскай народнай партыяй (ÖVP), паведамляе BILD.

Лідар FPÖ Херберт Кікль абвясціў аб правале перамоваў пасля сустрэчы з прэзідэнтам Аўстрыі Аляксандрам Ван дэр Беленам у Вене. Кікль заявіў, што вяртае мандат на фармаванне ўрада, бо бакам не ўдалося дамовіцца аб размеркаванні ключавых міністэрскіх пастоў.

Галоўным каменем спатыкнення стала Міністэрства ўнутраных спраў, на якое прэтэндавалі абедзве партыі. Паводле BILD, кіроўная ÖVP адмовілася перадаваць гэтую пасаду FPÖ праз яе прарасейскую пазіцыю. FPÖ яшчэ ў 2016 годзе падпісала пагадненне аб партнёрстве з партыяй «Адзіная Расія», што выклікала асцярогі выцеку сакрэтных звестак у Крэмль.

Цяпер магчымыя датэрміновыя выбары або фармаванне часовага ўрада пад кіраўніцтвам прэзідэнта. Левыя партыі ўжо заклікалі да новых перамоў аб кааліцыі без удзелу FPÖ, аднак іх папярэдняя спроба дамовіцца правалілася.

Пры гэтым новых выбараў FPÖ не баіцца: калі на парламенцкіх выбарах увосень 2024 года партыя набрала 29% галасоў, то зараз, паводле звестак сацапытанняў, яе падтрымка вырасла да 34%. Пакуль у краіне не сфармаваны новы ўрад, дзейныя міністры з ÖVP і «Зялёных» працягнуць выконваць свае абавязкі.