У Лібіі пры спробе замаху паранілі міністра

• 13.02.2025, 9:29

Палітык атрымаў кулявое раненне ў нагу.

У сталіцы Лібіі Трыпалі 12 лютага быў учынены ўзброены напад на дзяржміністра ў справах кабінета міністраў краіны Адэля Джуму. З інфармацыі, міністр атрымаў раненні і быў шпіталізаваны.

Цяпер стан здароўя Джумы стабільны, паведамляе Reuters. У сваю чаргу, Вarrons удакладняе, што Джума атрымаў кулявое раненне ў нагу. Органы бяспекі "прыступілі да расследавання для выяўлення абставін інцыдэнту і вышуку вінаватых", цытуюць выданні заяву ўрада краіны.

Урад нацыянальнага адзінства асудзіў напад, падчас якога, паводле яго вызначэння, "невядомая група страляла проста ў аўтамабіль дзяржаўнага міністра" Адэля Джумы.

Акрамя заявы аб расследаванні "для вышуку вінаватых", ва ўрадзе адзначылі, што "ніякія спробы, якія пагражаюць бяспецы і стабільнасці дзяржавы, не будуць дапушчаны".

Джума працуе ва ўрадзе з сакавіка 2021 года, ён кіруе каардынацыяй паміж офісам прэм'ер-міністра краіны і іншымі міністэрствамі Лібіі. Менавіта гэты чыноўнік лічыцца найбліжэйшым дарадцам прэм'ера краіны Абдэля Хаміда ад-Дбэйбы.

У афрыканскай Лібіі нярэдкія замахі на службовых асоб на фоне агульнай палітычнай нестабільнасці. Летась у красавіку адбыліся ўзброеныя напады на дом і офіс пляменніка і дарадцы прэм'ера Ібрагіма Дбэйбы.

А ў 2021 годзе міністр унутраных спраў тагачаснага ўрада Фатхі Башага цудам ацалеў падчас замаху на яго, які адбыўся, як і ў выпадку з Джумам, на шашы ў Трыпалі.