У швэдскай школе адбылася перастрэлка

• 4.02.2025, 17:05

Раненні атрымалі пяць чалавек.

У школе ў горадзе Эрабру ў цэнтральнай частцы Швэцыі (за 200 км на захад ад Стакгольма) адбылася перастрэлка. Як піша BBC са спасылкай на агенцтвы Reuters і AFP, раненні атрымалі пяць чалавек.

На месцы працуюць паліцыянты, лекары і ратавальнікі.

Паліцыя кваліфікуе перастрэлку, як цяжкае гвалтоўнае злачынства.

Інцыдэнт здарыўся да 13:00 паводле мясцовага часу. Супрацоўнікі правапарадку заявілі аб правядзенні буйной аперацыі, заклікаўшы людзей трымацца далей ад гэтага раёна.

«Пацверджана, што пяць чалавек атрымалі раненні, - гаворыцца ў заяве паліцыі. — Цяпер гэта разглядаецца як замах на забойства, падпал і злачынства з ужываннем зброі пры абцяжарваючых абставінах».

Імаверна, страляніна адбылася ў Камвуксе, ці цэнтры адукацыі для дарослых.

Гэтыя цэнтры наведваюць у асноўным тыя, хто не скончыў пачатковую ці сярэднюю школу.

На кадрах з месца здарэння бачна вялікая прысутнасць паліцыі, мноства машын хуткай дапамогі і аўтамабіляў экстраных службаў.