Трэці вялікі расейскі НПЗ спыніў дзейнасць

• 5.02.2025, 17:09

Завод спыніў дзейнасць пасля ўдару ўкраінскага БЛА.

Чарада атак украінскіх беспілотнікаў на расейскія рэгіёны на пачатку 2025 года паралізавала дзейнасць яшчэ аднаго буйнога нафтаперапрацоўчага завода.

Валгаградскі НПЗ "Лукойла", які ўваходзіць у топ-10 найбуйнейшых у Расеі і з'яўляецца галоўным прадаўцом паліва для Паўднёвай федэральнай акругі, спыніў дзейнасць праз удар дрона 3 лютага, паведамляе Reuters са спасылкай на тры крыніцы ў галіне.

Са слоў суразмоўцаў агенцтва, у выніку пажару на заводзе маглі атрымаць пашкоджанні адна з установак першаснай перапрацоўкі нафты, а таксама чыгуначная эстакада наліву нафтапрадуктаў. Рамонтныя работы на пашкоджаных дзялянках могуць заняць адзін-паўтара месяца, хаця частковае аднаўленне перапрацоўкі магчымае найбліжэйшым часам, удакладніла адна з крыніц.

Валгаградскі НПЗ, які вырабляе 4% усяго бензіну ў Расеі і 7% — дызельнага паліва, стаў трэцім заводам за апошнія тыдні, які спыніў выраб паліва праз удары УСУ. 24 студзеня адпраўкі спыніў Разанскі НПЗ "Раснафты", які забяспечвае палівам у тым ліку маскоўскі рэгіён. Пажар на заводзе закрануў устаноўку гідраачысткі авіяцыйнай газы і эстакаду наліву.

4 лютага стала вядома, што выраб паліва спыніў Астраханскі ГПЗ «Газпрама», які апроч сінтэтычных матэрыялаў і серкі вырабляе бензін і дызельнае паліва. На заводзе згарэла ўстаноўка перапрацоўкі стабільнага кандэнсату, а на яе рамонт, паводле звестак крыніц Reuters, спатрэбіцца не менш як тры месяцы.

У мінулым годзе пад налёт БЛА трапілі не менш як 15 буйных НПЗ, у тым ліку Валгаградскі НПЗ "Лукойла", Омскі НПЗ, Славянскі і Навашахцінскі НПЗ "Газпрам нафты" і нафтаперапрацоўчы завод "Раснафты" ў Туапсэ. У выніку аб'ёмы перапрацоўкі нафты ў краіне ўпалі да 12-гадовага мінімуму — 267 млн тон, а экспарт нафтапрадуктаў спусціўся на 9%, да 62 млн тон. За год, паводле падлікаў Reuters, расейскія НПЗ страцілі 41,1 млн тон, або 13% магутнасцяў праз прастойванне, выкліканае атакамі БЛА і цяжкасцямі з рамонтам.

Паводле Мінэнэрга РФ, выраб бензіну за год упаў на 6,4%, а дызельнага паліва - на 7,4%.