Украіна атрымала першыя французскія знішчальнікі Mirage 2000

• 6.02.2025, 13:27

Самалёты прыбылі сёння.

Украіна ўжо атрымала ад Францыі знішчальнікі Mirage 2000-5. Першыя з іх прыбылі ва Украіну сёння.

Як паведамляе РБК-Украіна, пра гэта міністр абароны Францыі Себасцьян Лекарню напісаў у Twitter.

«6 чэрвеня 2024 года, Эмануэль Макрон абвясціў пра пастаўку ва Украіну французскіх знішчальнікаў “Mirage 2000”. Першыя з іх прыбылі ва Украіну сёння», – напісаў Лекарню.

Ён удакладніў, што самалёты, разам з украінскімі пілотамі на борце, якія прайшлі шматмесячную падрыхтоўку ў Францыі, будуць дапамагаць бараніць украінскае неба.

Што вядома пра Mirage 2000

Mirage 2000 – гэта шматмэтавы знішчальнік чацвёртага пакалення, распрацаваны французскай кампаніяй Dassault Aviation. Ён упершыню ўзняўся ў неба ў 1978 годзе і стаў асноўным баявым самалётам ВПС Францыі, а таксама экспартаваўся ў шэраг іншых краінаў.

Дзякуючы дэльтападобнаму крылу Mirage 2000 валодае высокай манеўранасцю, а ягоная максімальная хуткасць перавышае 2 Маха. Самалёт аснашчаны сучаснай авіёнікай, магутным бартавым радарам і можа несці шырокі спектр узбраення, уключаючы кіраваныя ракеты «паветра – паветра» і «паветра – зямля».

Mirage 2000 існуе ў некалькіх мадыфікацыях, сярод якіх знішчальнікі-перахопнікі, ударныя варыянты і двухмесныя навучальна-баявыя версіі. Дзякуючы прастаце абслугоўвання і высокай надзейнасці Mirage 2000 застаецца ў страі нават пасля з'яўлення больш сучасных самалётаў, такіх як Rafale.