Зяленскі: Расея плануе павялічыць войска яшчэ на 100 тысяч чалавек

• 8.02.2025, 18:41

Пуцін не жадае міру.

Расейскі дыктатар Пуцін рыхтуецца не да перамоў, а да працягу вайны. Між іншым, вораг павялічвае сваё войска на больш за 100 тысяч вайскоўцаў.

Пра гэта ў відэазвароце заявіў прэзідэнт Украіны Уладзімір Зяленскі.

«Пуцін рыхтуецца зусім не да перамоў, не да міру, а да працягу вайны, і не толькі супраць нас, супраць Украіны. Яны зараз павялічваюць сваё войска яшчэ на больш чым 100 тысяч жаўнераў», - заявіў украінскі прэзідэнт.

Зяленскі зазначыў, што ўсе партнёры павінны пра гэта ведаць і павінны гэта бачыць. Адпаведную інфармацыю Украіна гатова перадаваць, і па лініі разведак ужо адбываецца адпаведная камунікацыя. Больш за тое, кіраўнік украінскай дзяржавы падкрэсліў, што кожнай краіне ў Еўропе давядзецца ўмацоўваць абарону.

«Мы павінны разам бачыць, якія ёсць пагрозы і якія ёсць нашыя інструменты супрацьдзеяння. Трэба дакладнае разуменне: тут, у Еўропе, кожнай краіне давядзецца ўмацоўваць абарону, і мэта ў 5% ВУП на абарону не знікне з парадку дня», - сказаў ён.

Таксама Уладзімір Зяленскі паведаміў, што сёння ва Украіне знаходзіцца новы кіраўнік Вайсковага камітэта NATO. Між іншым, абмяркоўвалася падрыхтоўка да сустрэчы ў фармаце «Рамштайн», а таксама ўкраінскі прэзідэнт сказаў, што паводле звестак украінскай разведкі - вораг развівае новыя вайсковыя вытворчасці.

«Мы абмеркавалі сёння падрыхтоўку да «Рамштайн» і патрэбы ўкраінскай абароны - нашай агульнай абароны. Цяпер мы ведаем - украінская разведка нам дакладвае, - што расейцы ствараюць новыя дывізіі, новыя вайсковыя вытворчасці развіваюць. Відавочна, будзе і надалей пашырацца іх супрацоўніцтва з Паўночнай Карэяй. На жаль, сучасныя тэхналогіі вайны Масква распаўсюджвае яшчэ ў той рэгіён, між іншым беспілотныя тэхналогіі», - распавёў Зяленскі.

Ён патлумачыў, што гэта, між іншым, і азначае, што Пуцін рыхтуецца працягваць вайну.