У Фінскім заліве пашкоджаны два расейскія кабелі

• 8.02.2025, 20:31

Яны злучаюць асноўную тэрыторыю РФ і Калінінград.

Берагавая ахова (БА) Фінскага заліва сочыць за рамонтам расейскім суднам абарванага расейскага кабеля ў выключнай эканамічнай зоне (ВЭЗ) Фінляндыі. Пра гэта ў суботу, 8 лютага,паведамілі ў сацсетцы X прадстаўнікі БА.

«Берагавая ахова Фінскага заліва сочыць за выкананнем закона аб ВЭЗ і ўмовамі засваення ВЭЗ у Фінскім заліве, дзе расейскае судна рамантуе абарваны расейскі кабель», - падкрэсліваецца ў апавяшчэнні.

Кары Клем, кіраўнік аднаго з аддзелаў міністэрства эканомікі і занятасці Фінляндыі, паведаміў вяшчальнай карпарацыі Yle, што рамонтныя працы вядуцца на кабелі «Балтыка», які належыць расійскай дзяржкампаніі «Ростелеком».

На аперацыю спатрэбіцца каля тыдня - канчатковыя тэрміны залежаць ад умоў надвор'я, заявіў Клем. З ягоных слоў, усяго ў Фінскім заліве абарваны два кабелі паміж асноўнай тэрыторыяй РФ і Калінінградам.